Исәптә торучылар саны артырга түгел, кимергә тиеш
Узган ел наркотиклар әйләнеше һәм андый матдәләрне законсыз саклау очраклары буенча район Эчке эшләр бүлегендә 22 җинаять эше ачылган. Әлеге эшләрнең күпчелеге Яр Чаллы һәм аңа терәлеп торган территорияләрдә кылынган җинаятьләр белән бәйле. Бу турыда наркотикларга каршы көрәш буенча район комиссиясенең утырышында Эчке эшләр бүлеге башлыгының оператив хезмәт буенча урынбасары...
Район юлларында наркотик матдәләр белән ике кеше тоткарланган. Яр Чаллы - Комсомолец арасында 1992 елгы ир-аттан 343 грамм марихуана, Яр Чаллы - Зәй трассасында Круглое Поледа яшәүче 1983 елгы хатын-кыздан 22,968 грамм героин алынган. Оператив чаралар вакытында шулай ук тарту катнашмасы алынган очраклар да булган.
Районда наркотик матдәләр кулланучы 28 кеше диспансер исәбендә тора. Аларның 17се табиб-наркологта профилактик исәптә. Районның баш табиб-наркологы И.Мусин исәптә торучылар арасында 18 яшькә кадәргеләр юк дип белдерде. Һәм, сөенечкә, соңгы елларда андыйларның теркәлгәне дә юк, диде ул. Ә исәптә торучыларның күпчелеге Круглое Поле, Татарстан, Нефтебаза кебек эре җирлекләрдә. Кызганыч, аларның саны кимеми, киресенчә, исемлектә яңа фамилияләр барлыкка килә. Мәсәлән, күптән түгел профилактик исәпкә Боерганда яшәүче ике кеше өстәлгән.
Күпчелек полинаркомания белән шөгыльләнә, дип белдерде баш нарколог. Моңа, нигездә, төрле наркотик матдәләр белән эшкәртелгән тозлар керә. Соңгы вакытта мондый тискәре күренеш Яр Чаллыда киң таралган. Һәм бу район авылларына үтеп керә бара. Дөрес, тозларны хәзер ирекле рәвештә сатып алып булмый, ләкин бу матдәләрне таратучы яшерен нокталар юк түгел.
Соңгы елларда өлкән сыйныф укучыларының наркотиклар куллану-кулланмавын тестлар ярдәмендә тикшерә башладылар. Бу профилактик чара бар мәктәптә дә үтәчәк, дип белдерелде утырышта. Бу бик җитди мәсьәлә, тикшерүдән өлкән сыйныфта укучы бер генә укучы да читтә калмасын иде дип тәкъдимнәрен, теләкләрен җиткерделәр комиссия әгъзалары. Ләкин, белгечләр әйтүенчә, әлеге тестлар яңа төр наркотикларны - тозларны ачыклый алмый икән. Шулай икән, бер караганда, тестлар белән тикшерүнең файдасы никадәр соң? Ә үзебез тозлар куллану иң киң таралган күренеш дибез...
Комиссия утырышында районда волонтерлык хәрәкәтен булдыру тәкъдиме белән дә чыктылар. Бу -
яшьләрне тәрбияләүдә бер уңай чара булыр иде дип белдерделәр. Оештырган очракта, иң беренче аның әйдәп баручысын билгеләргә, һәр адымны уйлап башкарырга кирәк булачак. "Һәм, әлбәттә, һәр эшнең нәтиҗәсе булырга тиеш. Без исәптә торучыларның артуын түгел, кимүен күрергә тиешбез", - дип белдерде комиссия рәисе урынбасары, башкарма комитет җитәкчесе Р.Асылгәрәев.
Иң мөһим һәм кызыклы язмаларны Татмедиа Telegram-каналында укыгыз
