Беренче этап җиңүчеләре

Мәктәп балалары арасында уздырылучы «IT-Чемпион» конкурсы 2013 елның 1 мартыннан 20 декабренә кадәр дәвам итәчәк. Ә бәйгенең I этабы исә 24 майда төгәлләнде. Конкурс «Иң актив мәктәп укучысы» дип аталган балл-рейтинг һәм «ТРның дәүләт һәм муниципаль хезмәтләр порталын үстерү» иҗади номинацияләре буенча үтә.

Әлеге бәйгедә районның барлык мәктәпләре дә катнаша.

Республикакүләм конкурсның I этабы җиңүчеләре инде билгеле булды. Алар «Иң актив мәктәп укучысы» исемен алды. I урынга Круглое Поледан Ксения Попова (X сыйныф), II урынга Мәләкәстән Эльвина Шагалиева (VII сыйныф) һәм III урынга Бикләннән Гүзәл Якупова (XI сыйныф) лаек булды.

«IT-Чемпион» конкурсының II этабы 25 майдан 1 сентябрьгә кадәр уздырылачак. Күрсәтелгән сайтта (https://edu.tatar.ru/it-champion.html) барлык кызыксындырган сорауларга җавап табып була. Анда теркәлү узып, барлык дәүләт түләүләрен шушы портал аша башкарган укучы баллар җыя бара. Ә баллар исә, үз чиратында, iPAD һәм iPAD mini кебек бүләкләрне оту мөмкинлеген бирә.