Укучым – Татарстан һәм Россия чемпионы

Күптән түгел минем укучым Артур Җиһаншин Казан шәһәрендә узган татар-башкорт көрәше буенча ярышларда батыр калды.

Бу егетнең көннән-көн зуррак уңышларга ирешә баруына үзе укыган Теләнче Тамак мәктәбе дә шаһит. Артур физкультураны үзенең яшәү рәвеше итеп кечкенәдән үк сайлады. Теләнче Тамак авылында яшүсмерләр өчен оештырылган "Милли көрәш" түгәрәгенә 5 сыйныфтан йөри башлады. Җитәкчесе Рамил Наил улы Закиров Артурны милли көрәш буенча һәр ярышта катнаштырып, кирәк вакытта мактап, кирәк урында кырыслык та күрсәтеп, чын ир-егет итеп тәрбияли алды. "Артурның холкы чын спортчыларныкы. Нинди ярыш уздырсам да, ул беренче булырга омтыла", - ди шәкерте турында тренеры Р. Закиров. Остазының һәм үзенең тырышлыгы нәтиҗәсендә Артур бик яхшы күрсәткечләргә, үз алдына куйган максатларына ирешә алды. Һәр көн иртән сәгать биштә торып, 5-6 км йөгерде. Махсус күнегүләрне дә арттырды. Режимны бозмады, дөрес туклануга басым ясады.

Мин аны кечкенәрәк вакытта класс җитәкчесе, укытучысы буларак бераз кызганып та куя идем, организмына зыян салудан куркып: "Әллә бераз ял итәсеңме? Бәлки берәр җиңелрәк спорт төре сайларсың?" - дип тә әйтә идем. Артур: "Минем көчле буласым килә", - дип җавап бирә иде.

Милли көрәш буенча ярышларда, сабантуйларда Артурның җиңү яулаулары - безгә зур сөенеч. Мондый җиңүләргә бик тиз генә ирешеп булмый. Алар артында көндәлек тырыш хезмәт.

Балаларда спортка уңай караш тәрбияләү максатыннан мәктәбебездә шактый эшләр башкарыла. Ветеран спортчы Камил Шәрәфетдинов белән очрашулар оештырабыз, аның призына көрәшләр үткәрәбез, мәрхүм спорт остасы Зөфәр абыйның спорт өлкәсендәге уңышларын өйрәнәбез. Көрәш чемпионнары Зөфәр һәм Камил абыйларның данлы юлын хәзер яшьләр арасында Артур Җиһаншин дәвам итә. Без аңа уңышлар һәм ныклы сәламәтлек телибез.