Тәмәке тартуның зыяны һәм гражданнарны тәмәке төтененнән саклау турында февраль аенда яңа Федераль закон чыкты. Ул яңа таләпләрне үз эченә ала. Законда әйтелгәнчә, тәмәке тартуга каршы көрәш төрле юнәлешләрдә алып барылачак. Моңа тәмәкегә каршы агитация, аерым урыннарда тартуны, шулай ук тәмәке сатуны тыю һәм башкалар керә. Әлеге закон буенча, хәзер...
Тәмәке тартуның зыяны һәм гражданнарны тәмәке төтененнән саклау турында февраль аенда яңа Федераль закон чыкты. Ул яңа таләпләрне үз эченә ала. Законда әйтелгәнчә, тәмәке тартуга каршы көрәш төрле юнәлешләрдә алып барылачак. Моңа тәмәкегә каршы агитация, аерым урыннарда тартуны, шулай ук тәмәке сатуны тыю һәм башкалар керә.
Әлеге закон буенча, хәзер җирле үзидарә органнары да халыкны тәмәке исеннән саклау һәм тәмәке тартуның аяныч нәтиҗәләре турындагы чараларны тормышка ашыруда үзләреннән өлеш кертергә, шулай ук кешене тәмәкегә бәйлелектән дәвалауда медицина хезмәткәрләренә ярдәм итәргә тиеш.
Мәгариф, сәламәтлек саклау, мәдәният, спорт объектларында, поездда, самолетта, корабльдә, автобусларда, шәһәр һәм шәһәр яны җәмәгать транспортында, вокзалларда, кунакханәләрдә, хакимият һәм җирле үзидарә органнары урнашкан биналарда, күпфатирлы йортларның гомуми кулланудагы урыннарында тәмәке тарту тыела дип ассызыклана законда. Тыелган территорияләргә кисәтеп торучы махсус билгеләр беркетелергә тиеш.
Закон үз көченә кергәч, тәмәке тарту махсус билгеләнгән урында, ачык җирдә яки вентиляцияле ябык бинада гына рөхсәт ителәчәк.
Тәмәке сату нокталарының исә тартырга тыелган урыннардан 100 метрдан якын булмавы мәҗбүри.
Россия Федерациясе субъектларында тәмәке тартуда башка төр чикләүләр кертелергә мөмкин.
Тел астына куела торган сагызсыман тәмәке (насвай) сату законда гомумән тыела. Шушы ук закон тәмәкегә бәйлелектән бушлай дәвалануга хокук бирә.
Законның төп положениеләре 2013 елның 1 июненнән, кайберләре киләсе елның 1 июненнән үз көченә керәчәк.
Иң мөһим һәм кызыклы язмаларны Татмедиа Telegram-каналында укыгыз
