Быел да 2010 елдагы кебек дуңгыз гриппы таралу куркынычы бар

Бу хакта ТР Министрлар Кабинетында узган брифингта республика Сәламәтлек саклау министрлыгының штаттан тыш балалар инфекционисты, КДМУ балалар инфекцион авырулары кафедрасы мөдире Владимир Анохин җиткерде. 2009-2010 елларда халыкны бик куркыткан A(H1N1) генлы вирус быел да кабатланырга мөмкин. Грипптан үлем очраклары да булган, ләкин аларның берсе дә авыруга каршы прививка ясатмаган, дип белдерде брифингта Сәламәтлек саклау министры Адел Вафин.

Татарстанга инде 766 мең вакцина кайтартылган. Бу беренче партия гына. Авыруларга тиз бирешүче категория кешеләренә прививканы бушка ясыйлар. Аларга 6 айлык һәм өлкәнрәк балалар, мәктәп укучылары, студентлар, йөкле хатын-кызлар, хроник авырулары булганнар, коммуналь һәм транспорт хуҗалыгы хезмәткәрләре керә. Грипп - эш урынында хезмәткәрләр булмавының иң киң таралган сәбәбе. Шуңа күрә предприятие җитәкчеләре үз кул астында эшләүчеләрне вакцинацияләүне инде хәзердән үк кайгыртырга тиеш. Чөнки авыру сезоны кергәнче халыкта вируска каршы иммунитет формалашкан булырга тиеш. «Халыкның 40 процентын вакцинацияләү бурычын куябыз»,- дип белдерде Адел Юнысович. Министр үзе дә әле күптән түгел Бөгелмә районында ФАП ачылу тантанасы вакытында гриппка каршы прививка ясаткан. «Үзебезнең илдә эшләнгән, фельдшер суыткычында саклана торган Совигрипп вакцинасын ясаттым», - диде Адел Вафин.

Прививканы йөкле хатын-кызларга, сабый балаларга ясатуны куркыныч дип санау дөрес түгел, дип әйтте белгечләр брифинг барышында. Алар өчен Совигрипп вакцинасының махсус консервантсыз ясалган төрен кулланалар. Министр бигрәк тә әти-әниләрнең җаваплылыгына басым ясады: «Балагызның сәламәтлеге сезнең кулда, Интернетта, социаль челтәрләрдә аерым кешеләрнең прививкаларга каршы язган язмаларына алданып, балагызның сәламәтлеген, гомерен куркыныч астына куймагыз», - диде ул.

Баш дәүләт санитар табибының Тукай районы буенча урынбасары Марат Гыйрьфанов та тукайлыларны гриппка каршы привика ясатып көрәшергә чакыра. «Вакцинацияләү әле ул бөтенләй авырмыйсың дигән сүз түгел, һәр кешенең организмы, иммун системасы үзенчәлекле. Ләкин авырган очракта өзлегүләр булмый кала, авыру җиңел формада узып китә», - диде Марат Вазыйхович.