Иске Абдулда көлке көне

Сәхнәгә ике команда күтәрелде. Ир-егетләр "Абдул кәмитләре" дип аталган командага берләштеләр, ә гүзәл затларыбыз "Хислеләр" дип таныштырдылар үзләрен. Нинди генә бәйгеләрдә көч сынашмадылар алар. Такмаклар, анекдотлар ярышы, футбол, "телсез" күренеш. Кемнәр генә булып кыланмадылар ярышучылар: Мактанчык үрдәк, Хуҗа Насретдин, Аучы, Тычкан, Тиен, Әби, Бабай, кәҗә һ.б. Командалар тамашачыларга "тозлы-тозсыз" сораулар бирде, бергәләп җырларга клип төшерделәр. Көлү, җыр, музыка һәм алкышлар тынып тормады. Бәйрәмнән халыкның тараласы килмәде. Ни генә дисәң дә, уен-көлкедән башка яшәве мөмкин түгел. Елмаеп-көлеп яшәүнең сәламәтлеккә уңай йогынты ясавын, гомерне озынайтуын белгечләр дә әйтә. Авылыбыз кешеләрен шулай сөендереп, сәламәтләндереп, көлдереп чын бәйрәм ясаган команда әгъзалары Назыйм Вәлиев, Резеда һәм Илсур Сафиннар, Радик Мәүләвиев, Рәшит Сәгыйдуллин, Рәйхана Галиева, Раушания Сәгыйдуллина, Фәйрүзә Гарфетдиноваларга авыл халкы, мәдәният хезмәткәрләре исеменнән зур рәхмәт әйтәбез.