Тукайлыларны татар теленең, авыл мәктәпләренең киләчәге борчый

Безнең Күзкәй урта мәктәбенең татар теле һәм әдәбияты укытучысы Нәзилә Фәннүр кызы Авзалова 16 ел эшләү дәверендә балаларны татар халкының мең еллар буена килгән төп мирасы - тел байлыгын саклау өчен зур тырышлыгын куя. Татар телен өйрәнүгә бирелгән өстәмә дәресләрне имтиханнарга, төрле бәйгеләргә, олимпиадаларга әзерләнү өчен файдалана. Татар теле һәм әдәбиятыннан олимпиадаларның район туры узгач, күпләребез соклану катыш көнләшеп тә куйды. Нәзилә Фәннүровнаның җиде укучысы җиңүчеләр һәм призерлар исемлегендә иде. Татар әдәбиятыннан VII сыйныфтан Данияр Хафизов, IX сыйныфтан Эльмира Салихова, X сыйныфтан Диана Мусина, XI сыйныфтан Ләйсән Вәлиева, татар теленнән IX сыйныфтан Чулпан Зыятдинова, X сыйныфтан Айсылу Гыйльфанова, XI сыйныфтан Салават Шәрипов районда җиңүчеләр рәтендә иде. Сайлап алу этабын үтеп, Ләйсән, Айсылу һәм Диана, районыбыз данын яклап, февраль аенда республика олимпиадасында катнашу хокукы алдылар. Барыбызны да сөендереп, Ләйсән Вәлиева татар әдәбиятыннан бу олимпиадада призлы урын яулады. Ләйсән узган ел да үзенең көчен татар әдәбиятыннан республикада сынап карады. Җиңүчеләр рәтенә керә алмаса да, уңышлы гына чыгыш ясады. «Икенче елны, районда җиңсәм, бөтен материалны ятлап бетереп, барыбер призлы урынга чыгачакмын», - дип үзенә максат куйды ул. Бу бәйгеләргә әзерлек барышында укучылар калын-калын романнар укып чыктылар, бик күп өстәмә материал белән таныштылар, үзләре өчен бай чыганакларга юлыктылар. Татар теленең нечкәлекләренә төшенделәр. Эзләнүчән, иҗади эшләүче педагог Нәзилә Авзалова укучыларның фәнни-эзләнү эшләренә дә җитәкчелек итә.

- Мондый укучыларыбыз булганда мәктәбебезнең дәрәҗәсе төшмәс. Татар телен авыл мәктәпләре саклап калачагына ышанам, - ди Нәзилә Фәннүровна.