Тимер юлчыларның эшләре зур җаваплылык һәм төгәллек таләп итә
Бу атнаның якшәмбесендә тимер юл хезмәткәрләре үзләренең һөнәри бәйрәмнәрен билгеләп үтәчәк. Круглое Поле станциясе - Республиканың төньяк-көнчыгыш тимер юлының «йөрәге». Бүгенге көндә аның төп эше төрле предприятиеләргә чимал ташучы йөк поездларына хезмәт күрсәтүдән гыйбарәт. Тимер юлчыларның һөнәри бәйрәмнәре уңаеннан без Круглое Поле станция башлыгы Зинфира Адилова белән очрашып, әңгәмә кордык.
Зинфира Радисовна тумышы белән Оренбург якларыннан. Урта мәктәпне көмеш медальгә тәмамлап, Самара шәһәренең Куйбышев тимер юл транспорты институтын сайлый.
- Тормыш иптәшем Әкрәмжон белән институтта укыган вакытта таныштым. Укып бетергәч безне юллама буенча Бөгелмә шәһәренә җибәрделәр, - дип сөйләп китте әңгәмәдәшем.
Зинфира ханым Бөгелмә шәһәрендә 19 ел хезмәт куя. Шушы дәвер эчендә станция дежурные, иминлек буенча инженер, станция башлыгы урынбасары, Бөгелмә станциясе инженеры вазыйфаларын башкара. Ире локомотив депосында эшли.
- Круглое Поле станциясендә эш тәкъдим иткәч, монда килеп, баш инженер вазыйфасын башкардым. Ә 2013 елның апреленнән исә станция башлыгы булып эшлим. Эшебез авыр булуына карамастан, бик кызыклы. Коллективта 120 кеше эшли. Станция буенча кизү торучылар, диспетчерлар, операторлар, поездларны кабул итүчеләр - барысы да яшьләр, шунысы куанычлы. Минем урынбасарларым да яшь егетләр, бергәләшеп киңәшләшеп эшлибез, - ди Зинфира ханым.
Зинфира Радисовнадан гаиләсе турында да кызыксындык.
- Ирем - минем ышанычлы терәгем. Коллегам булгангадыр, мине, эшемнең асылын яхшы аңлый, һәрвакыт ярдәмгә киләргә әзер ул. Эш көнем иртәнге сәгать 6.30дан төнге 10нарга кадәр дәвам иткән чаклар да булгалый. Ничек кенә булмасын, гаиләм мине һәрвакыт аңлый. Улым Алмаз Круглое Поле поселогы мәктәбендә чит телләр укытучысы булып эшли, юриспруденция буенча икенче югары белем ала. Кызым Луиза быел XI сыйныфка бара. Әйбәт укый, хыялы - табиб булу. Гаиләм белән горурланам, - дип җавап бирде Зинфира Адилова.
Зинфира ханым безне станция буенча дежур Фәния Нәгыймуллина белән таныштырды. Фәния ханым да әлеге хезмәтенә 27 елдан артык гомерен багышлаган.
- Менә монда диспетчерыбыз Сергей Кашин утыра, - дип таныштыра Зинфира Радисовна. - Биредә ул 10 елдан артык эшли. Тимер юл транспорты хезмәткәре вазыйфасы үтә дә зур җаваплылык һәм төгәллекне таләп итүче хезмәт. Коллективтагы бөтен кеше дә үз эшләренең осталары, - дип төгәлләп куя әңгәмәдәшебез.
Һөнәри бәйрәмнәре уңаеннан, аларның һәрберсенә исәнлек-саулык, гаилә бәхете, эшләрендә уңышлар теләп калабыз.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
