Челтерәп ага “Нәгыйм чишмәсе”

Район башлыгы Фаил Камаев авыл халкының шушы олы шатлыгын уртаклашты

- Чишмәне авыл халкының, җирле хакимиятнең уртак тырышлыгы белән чистарттылар һәм төзекләндерделәр. Бу бик яхшы. Күзкәйлеләр һәрнәрсәдә, шул исәптән табигатне саклауда, чишмәләрне төзекләндерү кебек игелекле эштә дә үрнәк булып торалар, – дип ассызыклады район җитәкчесе. Үз чыгышында ул биредә яшәүчеләргә һәм су алырга килүчеләр өчен ял итеп китәргә уңайлы урын булачагын билгеләп үтте.

Күзкәй авыл җирлеге башлыгы Эдуард Гәрәев үз вакытында үзара салым акчаларын тапшырган, республика бюджетыннан да вакытында ярдәм алган авыл халкына рәхмәт белдерде. Ул төзелеш эшләре подрядчысы, «Тукай Тепло-Газ» җәмгыяте директоры Мусанниф Хановка, алтын куллы тимерче Рөстәм Ясавиевка, авылда күп кенә мәдәни чараларны актив оештыручы, музыкант Марсель Садыйковка һәм тантананың баш «гаеплесе» Нәгыйм Салиховка рәхмәт хатлары һәм истәлекле бүләкләр тапшырды. Чишмәгә “Нәгыйм чишмәсе”, дип исем бирделәр.

Нәгыйм ага үзенең дусты Фагыйл белән өч дистә елдан артык элек авыл читендә әлеге чишмәне тапкан. Шуннан соң алар үз көчләре белән аны чистарталар, торба урнаштыралар. Берникадәр вакыт авыл халкы чишмәгә су алырга йөри, әмма вакыт узу белән су чыганагына алып барган сукмакка үлән үсә,  кешеләр аны оныта башлый. Лаеклы ялга чыккач, Нәгыйм ага чишмәне торгызырга, аның территориясен төзекләндерергә карар итә, ләкин мондый масштаблы эшне ялгызы гына тормышка ашыра алмаганга күрә, ул авыл җирлеге башлыгына, җирле депутатларга мөрәҗәгать итә. Авыл халкы белән киңәшләшкәннән соң, аны референдумга чыгаралар. Халык яхшы башлангычны хуплый, үзара салым акчаларының бер өлешен чишмәне төзекләндерүгә юнәлтә.

Бүген чишмәгә юл салынган, ял урыннары төзелгән, коймалы баскычлар ясалган. Нәгыйм ага барсын да кайгырта һәм суны тикшертергә бирә, төзүчеләр су составын күрсәткән нәтиҗәләр белән табличканы бирегә элеп куйганнар.  Ачкыч янында җирле депутат, эшмәкәр Руслан Шәйдуллин ял итү өчен эскәмияләр урнаштырган, район ветераннар советы рәисе Фәйруза Вәҗиева, тырыш авылдашларын җыеп, чәчәкләр утыртуны оештырган, ә авыл җирлеге башлыгы Эдуард Гәрәев өмә үткәргән.

Чишмәнең ачылуы авыл халкы өчен зур бәйрәм булды. Кыскасы, хәзер Күзкәйдә чиста су чыганагы белән матур ял итү урыны барлыкка килде. Җирле халык әйтүенчә, бер тапкыр “Нәгыйм ага чишмәсе”ннән  су алып кайтып чәй кайнатып эчсәң,  башка җирдән су алырга да теләмисең.

Рөстәм Зәкиев фотолары.